Die Abraham Kriel Kinderhuis Nylstroom het sy kommer uitgespreek oor die risiko’s van misbruik wat kinders in Suid-Afrika in die gesig staar. Huidige syfers dui op ʼn groeiende krisis in die samelewing waar die kwesbaarstes ʼn groter risiko op mishandeling het. Hierdie krisis is deur die Covid-19-inperkings vererger.
Volgens AKKN se Uitvoerende hoof, Gerda van der Merwe, word kinderhuise direk beïnvloed deur toenemende vlakke van geweld, mishandeling, uitbuiting en verwaarlosing van kinders in Suid-Afrika. By die Abraham Kriel Kinderhuis Nylstroom (AKKN) byvoorbeeld, het die aantal mishandelde kinders wat die afgelope jaar (2019/2020) toegelaat is, verdubbel.
“Die situasie plaas nie net bykomende druk op hulpbronne wat reeds gestrek moet word nie; ons werk toenemend in ʼn omgewing waar bevoegdheid en infrastruktuur om slagoffers van kindermishandeling te help, aan die afneem is,” het van der Merwe gesê.
Gevolglik het die Abraham Kriel Kinderhuis Nylstroom besluit om die Beskerm ons kinders-veldtog van stapel te stuur. Die doel van die projek is om owerhede te dwing om hulpbronne te prioritiseer om kindermishandeling te bekamp; om openbare steun teen kindermishandeling te mobiliseer; en om steun aan te moedig vir die dienste wat by kinderhuise vereis word ter ondersteuning van slagoffers van mishandeling.
Die AKKN gaan oor die komende maande verslae publiseer om die aspekte uit te lig wat met die voorkoming en vervolging van kindermishandeling kan help. Die eerste verslag (#SafeSpaces: are police stations able to serve vulnerable children?) gaan op 21 Oktober 2021 aangebied word.
